填海工程多烂尾 明日大屿玩唔过

香港嘅大型基建工程超支、延误已经成为新常态，市民亦听惯听熟，好似机场第三条跑道、港珠澳大桥、西九文化区、广深港高铁香港段，造价动辄数百亿元至过千亿元。呢，高铁每公里成本又贵绝全球！唔好话呢啲大型基建，上个月审计署先狠批观塘安达臣道发展工程计划，建条行人天桥因设计大幅改动都超支约10亿个大洋啦！计划耗资5,800亿元嘅明日大屿交椅洲人工岛填海项目，大家又估唔估到会超支几多呢？

呢嗱！明日大屿呢个填海工程，交椅洲人工岛最新方案由两岛变三岛，5,800亿元肯定埋唔到尾，有环团估计至少近8,000亿元，至实际付款日或更高！政府近排先至大呻库房「水干」，喺呢个时候，有团体发表报告，力陈事实，指出明日大屿玩唔过！团体发现，全球面积达1,000公顷或以上嘅填海工程，烂尾率高近80%。

环团搜寻全球299个有海岸线或大型内陆湖嘅国家及地区，最后筛选出52个过去30多年来，其用途、规模均与明日大屿有可比性嘅人工岛或近岸填海项目，符合条件嘅人工岛中，有13个项目填海面积达1,000公顷或以上，至少10个项目出现空置、停滞、被腰斩等问题，烂尾率达77%，仅得一个项目可完成工程。失败率咁鬼高，咪话唔夸张！唔好以为众多烂尾填海项目主要集中喺发展中国家噃！中国、南韩同马来西亚等都出现问题，可见情况普遍。据分析，较多地方会采用公私合营嘅发展模式，正正系明日大屿采用嘅公私合营融资模式，失败率属最高！

仲有更多实例，好似印尼嘅NCICD填海项目最后规模走样，令公营土地大幅缩水，原因之一系兴建期间超支严重，政府须拨更多土地予私人发展商。又譬如同南韩松岛嘅填海项目比较，其工程规模及规划等与香港明日大屿最相似，南韩政府意图将松岛发展成核心商业区，及公私合营发展模式；之但系该岛发展商业区嘅城市规划重叠，由外资公司承担98.4%开支嘅公私合营模式亦宣告失败，最终要由政府公帑埋单。环团发言人批评，现时启德CBD2计划已呈烂尾现象，质疑今日启德会否变成明日大屿？

政府搞明日大屿，正如团体批评系「了无胜算嘅赌局」，政府鬼祟展开「三无谘询」，即「无公布、无主动谘询公众、无公信力嘅谘询」，而且又将环评斩件，好多嘢未清楚就胆粗粗想做就去做，届时唔汤唔水就眼冤！经济刚复苏，政府又话目前要全力拼经济，咁就应该「俭以养廉，直而能忍」，要是好大喜功，不自量力，低估填海造价成本，若然超支延误兼烂尾，明日大屿搞出「明日大愚」就大剂！倒不如一条心发展好北部都会区，邻靠祖国，起码唔会衰吖！


转载说明:本文转载自USDT交易平台。